VRYSTAAT. – Sewe beweerde veediewe is Donderdag vasgetrek na inligting oor veediefstal op ‘n plaas in Senekal ontvang is.
Kapt. Stephen Thakeng sê die operasie deur polisielede van Ventersburg, Henneman en Virginia is omstreeks 03:00 op die R70 Ventersburg/Senekalpad geloods.
‘n Silwerkleurige Audi met Gauteng-nommerplate en ‘n rooi Volkswagen Polo met Vrystaat-nommerplate is voorgekeer. Messe en ‘n geslagte bees is in die voertuie gevind. Sewe verdagtes is in hegtenis geneem.
Thakeng sê voorlopige ondersoek het die polisielede na ‘n verlate plaashuis, 10 km van Senekal in die rigting van Paul Roux, gelei. Meer bewyse van die geslagte bees is deur die veediefstaleenheid by die huis gevind, asook nege ander lewendige beeste.
Die verdagtes het Maandag in die Ventersburg-landdroshof verskyn.
Die saak word deur die Odendaalsrus-eenheid vir veediefstal en bedreigde spesies ondersoek.
Foto: SAPD
