KWAZULU-NATAL. – Die polisie het ’n soektog begin na minstens twee gewapende mans wat twee persone, van wie een ‘n kind, doodgeskiet en sewe ander beseer het in ’n skietery in Major Calvertstraat in Wentworth. ‘n Hond is ook tydens die voorval doodgeskiet.
Luidens ‘n verklaring deur kol. Robert Netshiunda, polisiewoordvoerder, is die slagoffers tussen 15 en 22 jaar oud. ‘n Groep mense het buite ’n woonstel gesit toe ’n grys Mazda 3 stilgehou, twee mans uit die voertuig geklim en op die groep begin skiet het. Die mense het uitmekaar gespat, maar die aanvallers het hulle agternagesit en aanhou skiet. Twee persone is dood en sewe is met skietwonde na ‘n hospitaal geneem.
Die polisie sê die motief vir die aanval is nog onbekend, maar dat die betrokkenheid van bendes of dwelms nie uitgesluit word nie.
PT Alarms, wat op die toneel in Himestraat was, sê in ‘n sosialemediaplasing die verdagtes het glo munisipale kleredrag aangehad.
