DURBANVILLE, WES-KAAP. – Boland Snake Removals het onlangs ’n video op hulle sosialemediablad gedeel van waar hulle ’n Kaapse kobra agter ‘n skottelgoedwasser by inwoners van Durbanville uithaal.
Volgens hulle is die slang hoogs giftig. In die video kan gesien word hoe die slangvanger die skottelgoedwasser van die muur af wegskuif en die slang opgekrul vind. Hy verwyder dan die slang strategies. Die slang pronk selfs vir die kamera terwyl hy uitgetel word.
Vir baie is die winter wat naderkruip goeie nuus, want dit beteken die meeste slange gaan ondergronds vir hulle hibernasietydperk, waartydens hulle ook nie eet nie.
Die Kaapse kobra se byt sal hulle slagoffers se senuweestelsels aantas. Mense se asemhalingspiere word dan stelselmatig verlam, wat sal veroorsaak dat hulle nie meer kan asemhaal nie.
Kyk die video hier.
Bronne: Boland Snake Removals 24/7 and Pest Control, African Snake Bite Institute
