GAUTENG. – Die Stad Tshwane het ’n waarskuwing uitgereik dat die damwal by die Thabosdam naby Bronkhorstspruit moontlik kan meegee ná langdurige en swaar reën. Ingenieurspanne het Donderdag die damwal se sluise oopgemaak om water vinniger weg te lei en sodoende druk op die hoofstruktuur te verminder.
Volgens ‘n plasing op X waar die waarskuwing gerig is, het die onlangse reënval kommer by die stad se nooddiensdepartement laat ontstaan oor die stabiliteit van die damwal. Nooddienspersoneel, die polisie en rampbestuurspanne was op die toneel om die toestand van die dam te monitor en voorkomende maatreëls toe te pas.
Inwoners van Bronkhorstspruit en omliggende gebiede is gevra om kalm te bly, amptelike opdaterings te volg en laagliggende gebiede stroomaf van die dam te vermy. Hulle word ook versoek om na ‘n hoër gebied te beweeg indien owerhede dit beveel. Die publiek is ook gemaan om die gebied om die dam te vermy sodat noodspanne hulle werk kan doen.
Die Stad Tshwane sê die situasie word dopgehou. Verdere opdaterings sal verskaf word indien omstandighede verander.
