WES-KAAP. – Rosco Erasmus (13) van Velddrif het Vrydagmiddag in die Bergrivier by Rooibaai, Laaiplek verdrink.
West Coast Medical Rescue is saam met metro-nooddienste en NSRI-St. Helena na die toneel ontplooi. Getuies het aan die reddingsdienste gesê dat die jong man gesien is waar hy in die water sukkel, voordat hy onder die oppervlak verdwyn het. Sy liggaam is later naby die plek waar hy laas gesien is, uit die water gehaal.
Craig Lambinon, NSRI-woordvoerder, sê in ‘n verklaring ‘n noodspan is omstreeks 15:25 vir ‘n verdrinking ontbied. NSRI-redders het per boot na die toneel gevaar. Met aankoms is vasgestel dat die tiener onder die water in is. Twee plaaslike duikers het intussen reeds probeer help en onderwater begin soek. Die seun is uiteindelik onder ’n jetty in die rivier opgespoor en na die oewer gebring. Paramedici het hom op die toneel dood verklaar.
Die polisie het ’n geregtelike doodsondersoekdossier geopen en die liggaam aan die staatpatologiediens oorhandig.
Lambinon het die gemeenskap vir hulle vinnige reaksie bedank en meegevoel teenoor die tiener se familie uitgespreek.
Die seun is op sosiale media in die kommentaar van West Coast Medical Rescue deur Estelle Erasmus as haar suster se kleiseun geïdentifiseer.
