WASHINGTON / ISLAMABAD. – Die Amerikaanse president Donald Trump het ’n beplande reis van sy gesante na Pakistan gekanselleer, omrede daar “te veel tyd vermors word aan reis en te veel werk is om te doen”.
Die besoek sou deur Steve Witkoff en Trump se skoonseun, Jared Kushner, onderneem word om met Iranse verteenwoordigers in Islamabad te vergader, as deel van pogings om vredesonderhandelinge te hervat.
Volgens berigte van NBC News volg die kansellasie kort nadat Iran se minister van buitelandse sake, Abbas Araghchi, Islamabad verlaat het ná samesprekings met Pakistanse amptenare. Araghchi het vroeër aangedui dat geen formele ontmoeting met die VSA in die Pakistanse hoofstad beplan was nie en gesê dat Teheran nog moet bepaal of Washington “werklik ernstig is oor diplomasie”.
Trump het beklemtoon dat die besluit nie beteken dat vyandelikhede hervat sal word nie. Die Withuis het gehoop om vredesgesprekke ’n hupstoot te gee deur gesante na Islamabad te stuur, maar Teheran het nooit bevestig dat ’n direkte ontmoeting sou plaasvind nie.
Bronne: NBC News, CNN
