KWAZULU-NATAL. – Vier mense is Dinsdaggoggend net na 01:00 by ‘n gewilde restaurant in Floridastraat, Durban, geskiet tydens wat vermoedelik ‘n huishoudelike dispuut was. Twee van die slagoffers het hul lewens verloor.
Garrith Jamieson van ALS Paramedics het bevestig dat hul span vinnig na die toneel gehaas het. “Paramedici het die Metropolisie en sekuriteitspersoneel op die toneel aangetref en is na vier mense gewys wat skietwonde opgedoen het,” het Jamieson gesê.
Jamieson sê drie mans en ‘n vrou het skietwonde opgedoen. Die vrou, vermoedelik in haar 30’s het verskeie skietwonde opgedoen en is dood verklaar.
“Die beweerde verdagte was met veelvuldige skietwonde in ‘n kritieke toestand en is na die hospitaal gehaas waar hy ‘n rukkie later oorlede is.”
Volgens Jamieson is die twee ander mans met skietwonde aan hul bolywe na ‘n nabygeleë hospitaal vir verdere behandeling geneem.
“In hierdie stadium is die gebeure wat tot die skietvoorval gelei het onbekend, maar daar word beweer dit was ‘n huishoudelike dispuut. Die SAPD was teenwoordig en sal verdere ondersoek instel.”
