KWAZULU-NATAL. – Twee mans is Maandag net voor 17:00 dood nadat ’n taxi, twee motors en ’n voetganger in ’n meervoudige ongeluk op die hoek van Chris Hani- en Effinghamweg in Greenwood Park betrokke was. ‘n Voetganger en bestuurder van ‘n voertuig het hartstilstand ervaar en gesterf.
Garrith Jamieson van ALS Paramedics sê verskeie ambulansdienste het hulle vir hulp na die toneel gehaas. Die taxi het glo met twee voertuie gebots, waarna een van die voertuie ‘n voetganger gestamp het.
“Paramedici het die voetganger, ’n man in sy dertigs en een van die bestuurders, ’n man in sy veertigs, met kritieke beserings op die toneel aangetref. Albei het hartstilstand ervaar en is op die toneel dood verklaar,” het Jamieson bevestig.
Ongeveer 15 ander insittendes van die voertuie het beserings opgedoen wat van matig tot ernstig gewissel het. Hulle is ná stabilisering na verskeie hospitale in Durban vervoer.
Die oorsaak van die ongeluk is nog onbekend. Die polisie was op die toneel en ondersoek die voorval.
