VRYSTAAT. – Thaba Nchu-polisie het ‘n soektog begin nadat twee persone Sondag naby Ragogo-dam aangetref is waar hulle saam met ‘n voertuig aan die brand was.
Lt.kol. Thabo Covane sê ‘n voertuigopsporingsmaatskappy het op koördinate van ‘n alarm, van ‘n sisteem waarmee gepeuter word, gereageer. Met aankoms in ‘n oop veld, omstreeks 09:55, was ‘n Kia 1 Tonner-bakkie in ligte laaie. Met nadere ondersoek is twee brandende liggame op die bakkie gevind.
Hulp is ontbied en die polisie sowel as die brandweer het opgedaag. Die brand is geblus en daar kon gesien word die liggame is met kabelbinders en draad vasgebind. Hulle is dood verklaar. Misdaadtoneeldeskundiges het ‘n 9 mm-doppie op die toneel opgetel.
‘n Moordsaak is geopen.
Enigiemand met inligting word versoek om sers. Mpisane Bucibo by 082 466 7255 te bel.
