VRYSTAAT. – ‘n Kleutermeisie (2), ses vroue en drie mans het vanoggend omstreeks 04:20 op die N6 tussen Reddersburg en Smithfield in ‘n ongeluk tussen ‘n bus en vragmotor gesterf. Beide bestuurders het die ongeluk oorleef.
Brig. Motantsi Makhele sê nooddienste was vinnig op die toneel. Vyf passasiers met ernstige beserings is na hospitale in Bloemfontein geneem, terwyl nog 22 by die Stoffel Coetzee-hospitaal in Smithfield behandel word.
Voorlopige aanduidings is dat die bus met 35 insittendes vanaf Reddersburg na Smithfield op pad was en die vragmotor in die teenoorgestelde rigting onderweg was.
‘n Dossier vir strafbare manslag is geopen en die ongeluk word ondersoek.
Motoriste word gemaan om versigtig te wees, aangesien daar steeds nooddienspersoneel op die toneel teenwoordig is.
