MPUMALANGA. – ’n Gekombineerde poging tussen die Valke en die nasionale vervolginsgesag het Maandag daartoe gelei dat ’n dringende borgtogaansoek in die Lydenburg-landdroshof onsuksesvol was. Die saak behels onder meer vier Limpopo-polisiebeamptes wat na ‘n bewerde huisrooftog in Lydenburg, Mpumalanga in hegtenis geneem is. Altesaam sewe verdagtes het Maandag in die hof verskyn.
Lt.kol. Magonseni Nkosi, Valke-woordvoerder, sê in ‘n verklaring plaaslike polisiebeamptes het op ‘n huisrooftog-noodoproep reageer. ‘n Limpopo-blitspatrollievoertuig is aangetref en die vier insittendes kon glo nie verduidelik waarom hulle met ‘n staatsvoertuig op ‘n misdaadtoneel was nie. Die verdagtes is as sers. Lucky Shogolo (40) en konstabel Thapelo Ledwaba (34) van die Polokwane-blitspatrollie, konst. Malesela Huma (34) van die Mahwelereng K9-eenheid en konst. Saraphina Senama (34) van die Lebowakgomo-polisie, geïdentifiseer.
Twee voertuie met onwettige sigarette het van die toneel af weggejaag. Een voertuig met vervalste nommerplate is deur die polisie onderskep. Sello Komane (29), die bestuurder, is ook as een van die rowers geïdentifiseer. ’n Soektog in die polisievoertuig het kontant wat in ’n koeëlvaste baadjie versteek was, aan die lig gebring. Klagtes het toegeneem toe klaers die vier beamptes as die vermeende rowers uitgewys het.
Onwettige sigarette ter waarde van sowat R1,5 miljoen en R950 000 kontant in plastieksakke is in die slagoffers se woning gevind. Daniel Wikino (38) en Aleyo Shgutey (28), twee Ethiopiese burgers, is vir die besit en handel in onwettige sigarette aangekla. Hulle saak is uitgestel tot 20 Oktober om die dienste van ’n tolk te bekom.
Die verdediging se poging om borg vir die vyf ander beskuldigdes (die vier polisielede en Komane) te bekom, is deur die hof afgekeur nadat die NVG en Valke suksesvol aangevoer het dat verdere ondersoek nodig is. Die vyf bly in aanhouding totdat hulle weer op 17 Oktober vir hulle formele borgtogaansoek in die hof verskyn.
Die hof het bepaal dat die voorlopige ondersoek voltooi moet word voordat enige aansoek oorweeg sal word. Die ondersoek duur voort om die herkoms van die sigarette en die bron van die groot kontantbedrag vas te stel.
In ’n gesamentlike verklaring het die NVG en Valke die hof se besluit verwelkom.
