LIMPOPO. – ‘n Verdagte (44) is Maandagaand met ‘n vermoedelik gesteelde Toyota Fortuner op ‘n pad langs die N1 langs ‘n plaas buite Polokwane onderskep.
Kol. Malesela Ledwaba sê die polisie het inligting van die voertuig wat van Gauteng na Musina onderweg was, ontvang. Inligting is opgevolg, waarna die voertuig opgemerk en voorgekeer is. Die voertuig met die bestuurder as die enigste insittende se oorsprong is ondersoek. Daar is ontdek die voertuig is op 31 Julie in Wierdabrug, Pretoria, as gesteel aangemeld.
Die verdagte is in hegtenis geneem en sal binnekort op aanklag van die besit van ‘n gesteelde voertuig in die Polokwane-landdroshof verskyn.
Ledwaba sê voorlopige ondersoek het aangedui die voertuig was bestem om deur die Beitbrug-grenspos na Zimbabwe gesmokkel te word.
Die ondersoek duur voort.
