GAUTENG. – Musa Khawula (33), ‘n sosialemediapersoonlikheid, bly in aanhouding nadat hy Dinsdag op aanklag van crimen injuria, kubermisdaad en haatspraak in die hof voorgekom het.
Phindi Mjonondwane, woordvoerder vir die NVG, sê Khawula het na bewering tussen 10 en 12 Oktober 2024 afbrekende plasings van Zee Nxumalo (44) op sy sosialemediaplatforms, met ‘n groot aantal aanhangers, geplaas. Die doel was glo om Nxumalo se waardigheid aan te tas.
Die staat het borg teengestaan weens ‘n hangende moordsaak in die Vrystaat en ‘n uitstaande lasbrief vir inhegtenisneming vir roekelose en of nalatige bestuur. Sers. Mabunda se ondersoek het verder aan die lig gebring die beskuldigde se profiel en fisiese adres moet nog geverifieer word vir die samestelling van ‘n omvattende verklaring vir die borgtogaansoek.
Die saak kom op 21 Januarie vir borg voor, terwyl Khawula in aanhouding bly.
