GAUTENG. – Twee verdagtes, onderskeidelik 27 en 50 jaar oud, is Maandag deur die polisie op aanklag van ‘n massaskietery wat Saterdag in die Marry Me- informele nedersetting plaasgevind het, gearresteer. Vyf persone is in die skietery gedood en nog sewe is beseer.
Lt.kol. Christopher Singo van die Valke sê inligting is Maandag oor die groep verdagtes in uitbreiding 20, Soshanguve, opgevolg. Met aankoms van verskeie polisie-eenhede is ‘n verdagte gearresteer en ‘n 9 mm-Girsan-handwapen met ammunisie, waarvan die reeksnommer afgevyl is, gekonfiskeer. By ‘n tweede adres in uitbreiding 6 is ‘n tweede verdagte in hegtenis geneem en is op ‘n CZ 9mm-pistool, waarvan die reeksnommer ook afgevyl is, beslag gelê. Die vuurwapens sal ballistiese toetsing ondergaaan om vas te stel of dit moontlik by ander misdade in Gauteng gebruik is.
“Volgens inligting word die verdagtes na bewering met moorde en huisrooftogte wat op 21 Februarie 2025 plaasgevind het, verbind.”
Singo sê beide die verdagtes sal na verwagting Woensdag op aanklagte van moord, poging tot moord en die besit van ongelisensieerde vuurwapens en ammunisie in die Pretoria-Noord-landdroshof voorkom.
Senzo Mchunu, die minister van polisie, en lt.genl. Tommy Mthombeni, die provinsiale kommissaris, het Soshanguve vandag (Dinsdag) besoek.
