WES-KAAP. – ’n Kind (8) wat Vrydag as vermis aangemeld is, is Sondag by ’n skool in Nyanga opgespoor nadat die polisie ‘n ondersoek van stapel gestuur het. Die kind is intussen uit die betrokke pleegsorg verwyder en in ander pleegsorg geplaas.
Kapt. F.C. van Wyk, polisiewoordvoerder, sê aan Nuusflits ‘n ondersoek na ‘n vermiste persoon is aanvanklik deur die Nyanga-polisie geregistreer, waarna die saak na die Nyanga-eenheid vir gesinsgeweld, kinderbeskerming en seksuele misdrywe (GKS) vir verdere ondersoek oorgeplaas is. Volgens die polisie het die opsigter van die skool Vrydag al die klaskamers ná ’n funksie gesluit. Die skoolhoof het die skool eers Sondag vir lede van die Nyanga FKS-eenheid oopgesluit sodat hulle die skoolgebou en klaskamers kon deursoek. Die kind is in een van die klaskamers aangetref.
Hy is deur die polisie ondervra en daarna aan amptenare van die departement van maatskaplike ontwikkeling oorhandig. Van Wyk bevestig die kind is intussen uit die betrokke pleegsorg verwyder en in ’n ander pleeghuis geplaas.
