MPUMALANGA. – Drie susters en hulle broer, tussen die ouderdom van 36 en 45 jaar, is op Balfour in hegtenis geneem nadat hulle pa (71) Saterdag dood aangetref is.
Kol. Donald Mdhluli sê volgens inligting het gemeenskapslede omstreeks 11:00 die pa leweloos met skietwonde op die bank aangetref. Die polisie en nooddienste is ontbied en die pa is dood verklaar. Leë patroondoppies is op die toneel gevind.
Mdhluli sê ‘n moordsaak is geopen, waarna ‘n voorlopige ondersoek aan die lig gebring het die oorledene het ‘n beskermingsbevel teen sy kinders gehad. Met die ondersoek wat voortgaan, het die polisie die vier sibbe Saterdag op Heidelberg, Gauteng, in hegtenis geneem.
Die verdagtes sal vandag op ‘n aanklag van moord in die Balfour-landdroshof verskyn.
