KWAZULU-NATAL. – In twee aparte insidente op Sondag is ‘n vrou in ‘n ernstige toestand na ‘n hospitaal geneem en ‘n man is dood verklaar na ‘n verdrinking.
Volgens Garrith Jamieson van ALS Paramedics is die diens net voor 14:30 ontbied na ‘n insident by ‘n plaaslike strand in Doonside, naby Amanzimtoti. Lewensredders het op die toneel aan ‘n vrou, vermoedelik in haar 20’s, aandag geskenk. Paramedici kon haar stabiliseer voordat sy na ‘n nabygeleë hospitaal vervoer is vir verdere mediese sorg. Dit word vermoed dat die vrou in die water in die moeilikheid beland het.
Later, omstreeks 19:00, is ALS Paramedics na ‘n huis in MacDonaldstraat in Kingsburgh gestuur. Daar is die lewelose liggaam van ‘n man, vermoedelik in sy 50’s, naby ‘n privaat swembad gevind. Die man is dood verklaar ter plaatse. Die polisie ondersoek die omstandighede wat tot die verdrinking gelei het.
Jamieson het ook ‘n waarskuwing aan die publiek gerig, en gevra dat swemmers versigtig moet wees, veral wanneer hulle onder die invloed van enige middel is.
