VRYSTAAT. – ‘n Vrou (46) van Phuthaditjhaba is glo omstreeks 20:00 Sondagaand ná ‘n mislukte poging tot verkragting deur ‘n taxibestuurder in ‘n vol rivier gestamp. Sy het aan ‘n boomstomp vasgeklou en is Maandagoggend gered, nadat sy deur ‘n verbyganger gehoor is.
Luidens ‘n verklaring van AO Mmako Mophiring, polisiewoordvoerder, het die vrou in ‘n taxi geklim. In plaas daarvan om na die bestemming te ry, het die bestuurder glo afgedwaal en later op ’n brug stilgehou. Daar het hy volgens die polisie seks van haar geëis, wat sy geweier het. Hy het na die passasierskant beweeg en haar beveel om uit te trek. Toe sy weer weier, het hy probeer om homself op haar af te dwing. Die slagoffer het vir hom die geld aangebied wat sy by haar gehad het. Hy het dit geneem en haar daarna glo in die vol rivier ingestamp.
Die vrou het daarin geslaag om aan ’n boom vas te klou en het die hele nag so deurgebring totdat ’n verbyganger Maandagoggend haar hulpkrete gehoor het. Phuthaditjhaba-polisiebeamptes en Maluti-a-Phofung se brand-en-reddingseenhede het haar veilig uit die water gehaal, waarna sy na ’n plaaslike hospitaal geneem is vir behandeling.
‘n Saak van poging tot verkragting, poging tot moord en roof word ondersoek.
