OOS-KAAP. – ‘n Vrou (32) het vanoggend omstreeks 03:45 in die Gqeberha-hawe in ‘n voertuig in die see verdrink.
Kapt. Sandra Janse van Rensburg sê dit word as ‘n fratsongeluk beskryf. Na bewering was die vrou by die voertuigterminaal in die hawe aan diens. Sy was glo besig om met ‘n Ford Ranger-bakkie op ‘n skip op te ry, toe die voertuig skielik versnel en in die see in die hawe beland het.
Die vrou kon nie uit die gesinkte voertuig kom nie. Haar liggaam is intussen uitgehaal. Haar naam word weerhou totdat haar naasbestaandes van haar dood in kennis gestel is.
‘n Geregtelike doodsondersoek is deur Humewood-speurders geopen.
