MPUMALANGA. – ‘n Dringende waarskuwing is Vrydag omstreeks 15:30 deur die Umjindi Barberton-owerhede uitgereik nadat ingenieurs en die De Kaap-besproeiingsraad bevind het dat die damwal van die Senteeko-dam uiters onstabiel is en enige tyd kan meegee.
Volgens Barberton DA-raadslid, Philip Minnaar, het inspeksies getoon dat die ou oorloop uiters onveilig is, met kraakgeluide wat gehoor kan word. Noodwerk het geen effek gehad om die watervlak vinnig genoeg te laat daal nie. Hy sê die kleikern onder die oorloop is heeltemal blootgelê en besig om vinnig weg te kalwe.
Minnaar het gesê die gebied vanaf die dam deur die Barberton-vallei tot by Low’s Creek sal die meeste geraak word indien die damwal sou ineenstort. Inwoners is gemaan om gebiede naby die Suidkaap- en De Kaap-riviere, veral rivierkruisings, te vermy en om alle nood- en ontruimingsbevele na te kom.
“Die struktuur bly onveilig en die situasie word voortdurend gemonitor,” het Minnaar gesê.
