Hospitaalamptenare wat die liggame van gesneuwelde Palestyne ontvang het, het gesê hernieude aanvalle deur die Israeliese weermag het gister in die noorde en suide van Gasa voorgekom. ‘n Woonstelblok en ‘n polisiekantoor in Gasastad en ‘n tent in Khan Younis, is getref.
Die Hamas-beheerde ministerie van gesondheid sê ten minste nog 30 persone is kritiek beseer in die aanvalle.
Volgens Euronews is ten minste 29 liggame, waaronder talle kinders, Saterdag ontvang. Dit is van die meeste sterfgevalle sedert die skietstilstand tussen Israel en Hamas in Oktober ingestel is.
Die Israel-weermag sê die aanvalle is in weerwraak vir oortredings van die skietstilstand toe hulle Vrydag vier militante gedood het wat uit ‘n tonnel in ‘n Israeli-beheerde deel van Rafah gekom het.
Die aanvalle kom ‘n dag voordat die Rafah-grens op 1 Februarie (vandag) oopgestel sou word en terwyl die tweede fase van die skietstilstandooreenkoms stadig naderkruip.
Bronne: Euronews, The Times of Israel
