Phil Donahue is Sondagaand na ‘n lang siekbed oorlede. Hy was 88 jaar oud. Donahue, bekend as die “koning van daggeselsprogramme,” het die formaat van geselsprogramme met deelname deur die publiek bekendgestel.
Sy program The Phil Donahue Show het in 1967 in Dayton, Ohio, begin. Die program het gesprekke oor kontroversiële kwessies soos feminisme, homoseksualiteit en burgerregte ingesluit, en was veral gewild onder vroulike kykers.
Donahue het in 1980 met die aktrise Marlo Thomas getrou. Hy het vyf kinders uit ‘n vorige huwelik. Na sy program in 1996 tot ‘n einde gekom het, het hy kortliks in 2002 teruggekeer na televisie, maar die program is na ses maande gekanselleer.
Buiten sy geselsprogram het Donahue ‘n baanbrekende TV-gesprekreeks saam met Vladimir Posner tydens die Koue Oorlog aangebied, en was mede-regisseur van die 2006-dokumentêr Body of War. Hy het in Mei vanjaar die Presidensiële Medalje van Vryheid ontvang.
Die oorsaak van sy dood is nie bekend gemaak nie.
Bron: The Associated Press
