OOS-KAAP. – Die polisie glo hulle het die hoëkalibervuurwapens gevind, wat op 28 September in Lusikisiki gebruik is toe 18 persone dood en nog vyf gewond is. Nog twee verdagtes is in Flagstaff in hegtenis geneem en het in die hof verskyn.
Brig. Athlenda Mathe sê drie AK47- outomatiese aanvalsgewere en ‘n 243 Steyr Mannlicher-geweer is Donderdagaand gekonfiskeer. Die vuurwapens sal ballistiese toetsing ondergaan om vas te stel of dit in die misdaad gebruik is en ook om vas te stel of dit met ander misdaadtonele verbind kan word.
Luxolo Tyali, woordvoerder vir die NVG, sê nog drie verdagtes wat vir die moord op 18 persone aangekla is, het hulle borgaansoek in die hof laat vaar. Aphuwe “AP” Ndende (25), Lwando Antony Abi (33), Bonga Hintsa (31) en Siphosoxolo Myekethe (45) het dus nou almal hulle borgaansoek laat vaar. Die verdagtes staan op 18 aanklagte van moord en een van die besit van ‘n ongelisensieerde vuurwapen tereg.
Ndende en Hintsa is in Port Shepstone gearresteer, Abi in Oos Londen en Myekethe by sy huis in die Lusikisiki-distrik.
Volgens Tyali het Ndende aan die hof gesê hy het van ‘n moordsaak wat tans in die Flagstaff-landdroshof is, gevlug. Abi het onthul dat hy gedurende 2012 aan poging tot moord skuldig bevind en sewe jaar tronkstraf deur die Khayelitsha-landdroshof opgelê is. Hintsa het die hof ingelig dat hy ’n vorige veroordeling vir die besit van dwelms het en ’n opgeskorte vonnis van drie jaar in die Flagstaff-landdroshof opgelê is.
Myekethe het twee vorige veroordelings vir ontsnapping uit wettige aanhouding en moord. Die saak is vir verdere ondersoek tot 26 November 2024 uitgestel.
Intussen is twee verdagtes, wat vir die besit van vier vuurwapens wat vermoedelik tydens die Lusikisiki-aanval gebruik is, gearresteer en het in die Flagstaff-landdroshof verskyn. Hulle staan op vier aanklagte van die onwettige besit van drie AK47-aanvalsgewere en ‘n Steyr 243-geweer, asook die besit van 82 lewendige rondtes ammunisie tereg. Hulle saak is vir regsverteenwoordiging tot Maandag uitgestel.
Foto: SAPD
