Ses verdagtes het Vrydag vir onwettige vleisproduksie en immigrasie-oortredings in die hof verskyn.
Die eienaars van Gubta Meat, Mohammed Abdi Kadiye en Mohammed Ali Ahmed (albei van Somalië), asook hul medebeskuldigde Abdullah Abdinour, en twee Malawiërs, Kondwani Mwezhande en Smart Chipod, het in die Bluedowns-landdroshof op verskeie aanklagte verskyn.
Volgens Eric Ntabazalila, woordvoerder van die Nasionale Vervolgingsgesag (NVG), staan Kadiye en Ahmed, as eienaars van Gubta Meat, tereg op aanklagte van die onwettige produksie van vleisprodukte en die oortreding van die Wet op Voedingsmiddels en Skoonheidsmiddels. Hulle word verder beskuldig van die onwettige aanstelling van buitelanders, in stryd met die Immigrasiewet.
Mwezhande, Chipod en Abdinour word daarvan beskuldig dat hulle onwettig in Suid-Afrika is en ook betrokke was by die onwettige bedryf van ’n vleisproduksieonderneming sonder die nodige sertifisering.
“Die sesde beskuldigde word met soortgelyke aanklagte gekonfronteer, maar sy identiteit mag nie bekend gemaak word nie, aangesien hy minderjarig is,” sê Ntabazalila.
Die hof het die saak tot Maandag uitgestel sodat ’n Somaliese tolk beskikbaar kan wees en ’n datum vir borginligting en -aansoek bepaal kan word.
In die tussentyd is die minderjarige in die sorg van ’n voog geplaas.
