GAUTENG. – Ses beskuldigdes wat na bewering as sindikaat by renosterhoring-smokkelary betrokke is, het Dinsdag in die Pretoria-landdroshof verskyn.
Lumka Mahanjana, NVG-woordvoerder, sê in ‘n gesamentlike verklaring met die Valke John Frederick Hume (83), voormalige stigter en eienaar van Platinum Rhino Conservation Enterprise, Clive John Mervan Melville (63), instandhoudingsbestuurder, Izak Hermanus du Toit (50), praktiserende prokureur; Elizabeth Catharina van Niekerk (58), direkteur van ’n nie-winsgewende organisasie, Mattheus Hendrikus Wessels Poggenpoel (37), versekeringsmakelaar en deeltydse boer, asook Johannes Abraham Hennop (52), wildreservaatbestuurder, staan saam op 55 aanklagte tereg. Die aanklagte sluit korrupsie, bedrog en oortreding van die nasionale omgewingsbestuursbiodiversitetswet, die wet op oproerige byeenkomste, diefstal en geldwassery in.
Volgens die aanklagte sou die beskuldigdes tussen 2017 en 2024 ’n internasionale smokkelnetwerk bedryf en die departement van bosbou, visserye en die omgewing (DBVE) bedrieg het. Dit word beweer dat hulle permitte verkry het om plaaslik met renosterhorings handel te dryf, maar die horings na Asië wou smokkel. Die bedrogskema sou 964 horings, met ’n geraamde waarde van R250 miljoen, behels. Die Valke het die ondersoek behartig. Die ses het hulleself op 19 Augustus by die Pretoria-Sentraal-polisiekantoor oorhandig, waar hulle in hegtenis geneem is.
Adv. Patsy Jacobs, die staatsaanklaer, het aan die hof voorgehou AO Edward du Plessis, die ondersoekbeampte, het in ’n beëdigde verklaring bevestig dat die staat nie borgtog teengestaan het nie, omdat die beskuldigdes nie as vlugrisiko’s beskou word nie, hul adresse geverifieer is en hulle met die ondersoek saamgewerk het.
Tydens die hofverskyning is Hume borgtog van R100 000 toegestaan, Melville en Van Niekerk elk R10 000, terwyl Du Toit, Poggenpoel en Hennop elk borg van R20 000 ontvang het. Die borgvoorwaardes behels onder meer dat die beskuldigdes hulle paspoorte inhandig en hulle mag nie nuwe reisÂdokumente aanvra nie, hulle moet weekliks by hul naaste polisiestasie aanmeld, hulle mag nie met die ondersoek inmeng, getuies beïnvloed of met bewyse knoei nie, en hulle mag nie nuwe misdrywe pleeg terwyl hulle op borg is nie.
Melville het ‘n vorige veroordeling van bedrog en die besit en vervoer van ‘n renosterhoring geopenbaar. Hy het erkenning van skuld van R2 500 betaal. Poggenpoel het ook ‘n hangende saak bekendgemaak. Dié saak sal op 17 September in die Winburg-landdroshof voorkom. Ammunisie wat nie in ‘n kluis weggebêre is nie en skedule-medikasie is na bewering sonder ‘n permit deur die ondersoekspan in sy huis aangetref.
Die saak is vir verdere ondersoek tot 9 Desember uitgestel.
