KWAZULU-NATAL. – ’n Huiseienaar is Dinsdagaand ernstig beseer nadat hy by ’n woning in Rockford Drive, Phoenix, deur ’n pitbull aangeval en verskeur is. ‘n Bejaarde familielid is glo ook voorheen deur dieselfde hond beseer.
KZN VIP Protection Services sê dié diens se nooddienste is kort ná die voorval ontbied, waar dit vasgestel is dat die man tydens ’n interaksie met familielede deur die hond aangeval en ernstig beseer is. Die beserings was só ernstig dat bure hom reeds na ’n hospitaal geneem het voordat mediese spanne op die toneel was. ’n Tweede persoon is ook beseer toe daar ingegryp is in ’n poging om die slagoffer van die hond los te kry. Mediese hulp is aan een van die beseerdes op die toneel verleen voordat verdere behandeling in ’n hospitaal voortgesit is.
Volgens beskikbare inligting is dit nie die eerste keer dat ’n aanval by die betrokke woning plaasgevind het nie. Daar word verder beweer dat die familie reeds vroeër hulp gesoek het rakende die hond, maar sonder sukses.
Alle relevante nooddienste was op die toneel, en die voorval is aangemeld vir verdere ondersoek deur die toepaslike owerhede. Nooddienste het die publiek versoek om gevaarlike diere en potensiële risiko’s betyds by die verantwoordelike instansies aan te meld om ernstige beserings of moontlike sterftes te voorkom.
