OOS-KAAP. – Vier tieners tussen die ouderdomme van 17 en 19 jaar oud is Sondagaand, omstreeks 22:00 in ‘n buitegebou in Mdantsane NU1 geskiet, waarna drie oorlede is.
Kol. Priscilla Naidu sê na bewering het die eienaar van die huis skote gehoor van waar die jong mense gesit en studeer het. Een van dié wat beseer is, het vir hulp na die huis gehardloop. Een van hulle is op die toneel dood terwyl twee in die hospitaal oorlede is. Die gewonde tiener sterk steeds in die hospitaal aan.
Die leerders is onderskeidelik van die Senior Sekondêre Skool Buchule en die Senior Sekondêre Skool Mzomhle in die gebied waar die misdaad gebeur het.
Die motief vir die voorval, asook drie moorde en ‘n poging tot moord is deur die polisie ondersoek.
Siphelele Jako (32) is Maandag in hegtenis geneem en het gister in die Mdantsane-landdroshof verskyn. Die saak is tot 6 Februarie 2024 uitgestel terwyl Jako in aanhouding bly.
