Ná jare van afwagting en spekulasie oor wie by Daniel Craig as 007 gaan oorneem, het die rolverdelingsproses vir die nuwe James Bond amptelik begin.
“Die soektog na die volgende James Bond is aan die gang,” het Amazon MGM Studios in ’n verklaring gesê.
Verskeie oudisies het reeds die afgelope paar weke plaasgevind, volgens ’n verklaring wat deur die Hollywood-publikasie Variety uitgereik is. Die verklaring dui verder daarop dat die lang wagtyd vir ’n nuwe James Bond-film nou einde se kant toe staan.
“Hoewel ons nie van plan is om tydens die rolverdelingsproses kommentaar oor spesifieke besonderhede te lewer nie, sien ons daarna uit om meer nuus met 007-aanhangers te deel wanneer die tyd reg is,” het Amazon bygevoeg.
Die vrystelling van No Time to Die was Daniel Craig se laaste rolprent as die beroemde spioen. Dit was vyf jaar gelede.
Amazon MGM Studios het 15 maande gelede beheer oor die James Bond-franchise oorgeneem.
Die ateljee het verder aangekondig dat die volgende rolprent geregisseer sal word deur Denis Villeneuve, bekend vir Dune, terwyl die draaiboek geskryf sal word deur Steven Knight, die skepper van Peaky Blinders.
Bron: BBC News, Sky News
