MPUMALANGA. – Eric Ellias Sibanyoni (47), ‘n voormalige polisiekonstabel, is Maandag ‘n vonnis van twee jaar, opgeskort vir vyf jaar, deur die Belfast-landdroshof op aanklagte teen hom opgelê.
Lt. kol. Magonseni Nkosi sê Sibanyoni het sy werk verloor nadat hy betaling van motoriste op die N4 in die Wonderfontein-gebied gevat het. Die misdadige bedrywighede is in 2019 deur ‘n toeris aan die lig gebring. Met die inligting wat ontvang is, het die Valke, misdaadintelligensie en padverkeersbestuurskorporasie ‘n span saamgestel, waarna Sibanyoni vier maande nadat die inligting ontvang is, gearresteer is.
“Ondersoek het bewys dat Sibanyoni daarvoor verantwoordelik was om opsetlik voordeel te trek uit onetiese gedrag wat in stryd is met die Suid-Afrikaanse Polisiediens se gedragskode nadat hy R100 ontvang het om anderpad te kyk en nie sy plig nagekom het nie.”
Sibanyoni is tydens interne departementele prosedures uit die polisie ontslaan. Hy mag nie in die opgeskorte tydperk aan diefstal, korrupsie of bedrog skuldig bevind word nie.
