WES-KAAP. – Die Stad Kaapstad het bevestig dat die Bluedowns- munisipale hof tot verdere kennisgewing vir die publiek gesluit is. Die sluiting is as gevolg van protesaksie buite die Bluedowns-landdroshof.
Die munisipale hof is binne die Bluedowns-landdroshofkompleks in Buttskopweg, Blackheath, geleë. Die nasionale departement van justisie en grondwetlike ontwikkeling het die landdroshof vanoggend gesluit, wat daartoe gelei het dat die munisipale hof ook nie vir die publiek toeganklik is nie. Daar word verwag dat die hof weer op Dinsdag 29 Julie 2025 sal heropen, maar die publiek word aangeraai om vooraf te bel om bevestiging te kry.
Pre-datum verkeersoortredingsboetes kan steeds betaal word by geselekteerde Spar-winkels, aanlyn by www.paythat.co.za, of by enige ander munisipale hof in die stad.
Die Stad vra om verskoning vir enige ongerief. Vir hofnavrae kan Leslie Ann Anthony by 076 0888 849 gebel word.
Nuusflits het polisiekommentaar gevra.
