IERLAND / EUROPA. – Bomdreigemente wat die afgelope dae verskeie lugrederye en passasiersvlugte in Europa geteiken het, het nou ook na nuusorganisasies versprei. Nuuskantore in Ierland en Bulgarye is Vrydag ontruim nadat dreigemente ontvang is, terwyl ’n Britse uitsaaier bevestig het dat hy ook geteiken is.
Die Ierse openbare uitsaaier RTÉ se hoofkantoor in Dublin is ontruim nadat ’n e-pos ontvang is waarin beweer is dat ’n bom in die gebou geplaas is en binne 45 minute sou ontplof. Die polisie, Gardaí, het die perseel deursoek en dit later veilig verklaar. Personeel kon daarna terugkeer. RTÉ het intussen sekere programme tydelik met voorafopgeneemde uitsendings vervang.
Die dreigemente het ook ander Ierse media-organisasies geraak, onder meer die Irish Independent, Virgin Media en Newstalk. Die kantore van die Irish Independent is uit voorsorg ontruim, terwyl Virgin Media bevestig het dat hy ’n dreigement ontvang het, maar sy uitsendings voortgesit het. In Bulgarye is die nuuskantoor van Nova TV in Sofia ook ontruim en deur die polisie deursoek. Geen ploftoestel is gevind nie en personeel kon terugkeer. Die Britse uitsaaier Sky het ook ’n veiligheidsdreigement ontvang.
Volgens berigte is die e-posse aan RTÉ en Nova TV onderteken met die naam “Mikhail Andropov” en het dit die opskrif Message to the West gehad. Die persoon wat dit glo gestuur het, het beweer dat hy deel is van ’n groep wat verantwoordelik is vir die onlangse bomdreigemente teen vliegtuie in Europa. Die bewering kon egter nie onafhanklik bevestig word nie.
Die Ierse regering het gesê dit is nog nie bekend wie agter die dreigemente sit en of dit die werk van individue of ’n gekoördineerde poging is nie. Die regering meen daar is moontlik ’n verband met die ontwrigting van lugverkeer in Europa, maar die ondersoeke moet dit nog bevestig.
Soos Nuusflits vroeër berig het, is verskeie passasiersvlugte die afgelope week deur bomdreigemente geraak. Dit het tot veiligheidsondersoeke, vlugvertragings, herleidings en in sommige gevalle begeleiding deur vegvliegtuie gelei. Geen ploftoestelle is in die betrokke vliegtuie gevind nie.
Die identiteit van die persoon of persone agter die dreigemente, asook ’n moontlike verband tussen die aanvalle op lugverkeer en nuusorganisasies, bly onbekend. Ondersoeke duur voort.
Bronne: RTÉ, Al Jazeera, ABC News Australia
