NOORD-KAAP. – Verskeie mense het in die Vaalrivier by Douglas in die water beland toe ‘n boot omgeslaan het. Tot dusver is vyf liggame uit die water gehaal, terwyl na nog een gesoek word.
Polisiewoordvoerder, AO Molefi Shemane, sê die boot het persone oor die rivier van Vaallus-plaas na Olierivier-plaas vervoer. Tot dusver is vyf liggame uit die rivier gehaal, waaronder mans en vroue van verskillende ouderdomme. Hy het bevestig dat reddingspanne alles in hul vermoë doen om die laaste vermiste persoon op te spoor. Volgens voorlopige inligting was sowat 20 mense op die vaartuig wat mense tussen plase vervoer het toe die voorval vroegoggend plaasgevind het. Veertien mense het oorleef en is ná behandeling uit ’n plaaslike hospitaal ontslaan.
Aanvanklik is vier mense as vermis aangemeld, maar reddingspanne het intussen vyf liggame opgespoor. Die soektog moes tydelik opgeskort word weens swak sigbaarheid, maar is weer hervat met alle beskikbare hulpbronne. Die polisie het ’n geregtelike doodsondersoek geopen en ondersoeke na die presiese oorsaak van die voorval duur voort. Die soektog na die laaste vermiste persoon sal voortgaan.
