OOS-KAAP. – ’n Bulwalvis (humpback) is Dinsdag suksesvol suid van Kaap Recife in die oop see uit vislyne losgesny.
Craig Lambinon, woordvoerder van die South African Whale Disentanglement Network (SAWDN), sê in ‘n verklaring Kevin Warren van NSRI-Gqeberha het gesê die Lusitania Louisa-Claire, ‘n visvangvaartuig, het die verstrengelde walvis opgemerk en hulp ontbied. Die NSRI se Bay Guardian en Eddie Beaumont II, met SAWDN-opgeleide vrywilligers en gespesialiseerde toerusting, is ontplooi.
’n Groot bulwalvis wat in vislyne en ’n boei vasgevang was, met ’n lyn wat dit aan die seebodem geanker het, is aangetref. Die reddingsoperasie is verder deur ‘n rob, ander bulwalvisse en orkas bemoeilik. Die walvisse het die orkas verjaag.
Na vier uur is al die lyne losgesny en verwyder. Volgens Warren het die walvis gesond en sterk voorgekom en het saam met die ander walvisse weggeswem. Warren het die Louisa-Claire se skipper en bemanning vir hulle rol in die redding geprys.
Lambinon het voorts bevestig dat die netwerk die hele Suid-Afrikaanse kuslyn dek.
