GAUTENG. – ’n Vermeende dwelmsmokkelaar (25) is vanoggend (Dinsdag) by die OR Tambo Internasionale Lughawe (Ortia) in hegtenis geneem. Die verdagte het vanaf São Paulo, Brasilië via Doha, Katar, in die land aangekom.
Lt.kol. Amanda van Wyk, nasionale polisiewoordvoerder, sê in ‘n verklaring verskeie eenhede van die polisie, grensbestuursowerheid (BMA) en privaat veiligheidsmaatskappy het die verdagte kort ná landing suksesvol geïdentifiseer en onderskep. ’n Deursoeking van die verdagte se bagasie het gelei tot die beslaglegging van sowat 10 kg kokaïen met ’n geskatte straatwaarde van R4.2 miljoen. Die verdagte is ook vir ’n mediese ondersoek geneem om vas te stel of kokaïen-gevulde kapsules moontlik ingesluk is.
Volgens Van Wyk is meer as 25 verdagtes sedert die begin van die jaar by Ortia oor dwelmsmokkelary in hegtenis geneem.
