ETHIOPIë. – ‘n Beweerde vroulike dwelmsmokkelaar (29) van SA is in samewerking deur die SAPD en Ethiopiese federale polisie in Addis Ababa met kokaïen van R5.4 m. vasgetrek.
Brig. Athlenda Mathe sê Gauteng se teennarkotika-span het die verdagte deur Interpol “gemerk.” Daar is vermoed die verdagte reis na Brasilië om dwelms te kry en keer dan via verskeie lande terug na SA. Die vrou het in die eerste week van Oktober van OR Tambo Internasionale Lughawe na Brasilië vertrek. Haar reisplan het aangedui sy was veronderstel om van Brasilië, via Addis Ababa en Soedan, na SA terug te reis. Die polisie se span was op haar spoor en het die Ethiopiese federale polisie van haar bewegings ingelig.
Mathe sê die verdagte se bagasie is Saterdag met haar aankoms op Addis Ababa gemerk en daar is bevestig dit bevat 13 kg kokaïen. Sy is gearresteer en aangekla en sal in ‘n Ethiopiese hof verskyn.
“Die samewerking tussen die SAPD en die Ethiopiese federale polisie moet geloof word. Wanneer Afrika-polisie-organisasies saamwerk, kan en sal meer bereik word. Ons stempel die gesag van die staat op ‘n groter skaal af en stuur ‘n duideliker boodskap uit dat die lang arm van die gereg jou sal vind, maak nie saak watter roete jy gebruik om dwelms in SA te probeer verhandel nie. Ons verskerp ons stryd teen transnasionale georganiseerde misdaad en die handel in dwelms. SAPD se intelligensie is meedoënloos in hul strewe om een stap voor misdadigers te wees, dit is prysenswaardig,” sê genl. Fannie Masemola.
Mathe sê SAPD Gauteng se geheime intelligensie sal nou met Interpol teen met die Ethiopiese federale polisie saamwerk om die breine agter hierdie besending dwelms te ondersoek.
