WES-KAAP. – Karnallie, ‘n 15-jarige miniatuur-Schnauzer, wat 13 jaar gelede uit sy huis in Oranjezicht gesteel is, is die naweek onverwags in Koebergweg in Kaapstad gevind. Gelukkig was Karnallie met ’n mikroskyfie toegerus wat sy geskiedenis verklap het.
Die Animal Welfare Society of SA vertel in ‘n sosialemediaplasing ’n merkwaardige verhaal van hoop, volharding en nuwe begin. Karnallie, blind en verswak, het verskrik rondgedwaal toe ’n verbyganger hom opgemerk het. Die man het huis toe gehardloop, ’n wasmandjie en ’n kamerjas gaan haal en dit gebruik om die angstige hond veilig te vang. Aanvanklik het Karnallie probeer wegkom en selfs probeer byt, maar ná ’n paar uur het hy begin vertrou en uiteindelik kos en water aanvaar.
By ’n veearts in Pinelands is ontdek dat hy onder meer heeltemal blind is van katarakte en sy tande verwaarloos is. ’n Stuk draad in sy voorbeen het vir jare lank pyn veroorsaak. Sy redder het ure geneem om die draad te verwyder.
Toe die eienaars deur middel van die inligting op die mikroskyfie gekontak word, was hulle stomgeslaan – hy is 13 jaar gelede gesteel. Ná maande se vergeefse soek het hulle uiteindelik aanvaar dat hy weg is. Intussen het die gesin drie ander honde aangeneem en was hulle nie meer in ’n posisie om hom terug te neem nie.
Maar die verhaal het ’n hartroerende wending geneem. Sy redder, wat reeds sy vertroue gewen het, het aangebied om vir Karnallie ’n liefdevolle huis te gee.
