NOORDWES. – Daniël Janse van Rensburg (1) wys bemoedigende tekens van herstel nadat hy in ‘n kritieke toestand ná ‘n byna verdrinking in internsiewe sorg opgeneem is. Sy liggaamstemperatuur is stabiel en hy is van ‘n ossilator na ‘n ventilator oorgeskuif, ‘n stap wat die familie as ‘n belangrike verbetering in sy toestand beskou. “Vir ons is dit ’n wonderwerk,” sê sy ma. “Prys die Here met ons hele hart daarvoor. Ons kan absoluut God se hand in hierdie situasie sien.”
Marlize Janse van Rensburg, sê aan Nuusflits boonop toon sy infeksiemerkers daaglikse verbetering. As daar met hom gepraat word, beweeg hy sy kop en ledemate liggies. Hoewel sedasie vir Daniël weer aangepas moes word om hom stabiel te hou, sien die familie die positiewe gebeur. “Ons glo vas dat God reeds besig is met ’n wonderwerk in sy liggaampie.”
Dinsdag het Daniël ’n terugslag beleef toe sy bloeddruk en suurstofvlakke tydens pogings om sy temperatuur te stabiliseer skielik gedaal het, maar sy huidige vordering bring nuwe hoop vir sy familie. Die volgende belangrike stap is ’n MRI-skandering wat vir Woensdag beplan word om te bepaal of daar enige skade is. Sy familie glo dat die uitslag goed sal wees.
Hulle spreek hul dank uit teenoor die mediese personeel, veral die pediater, dr. Moshesh, wat deurentyd by haar pasiënte is en na hulle omsien. “Van die oomblik wat Daniël by die hospitaal aangekom het tot waar ons langs sy bed staan, het ons nog nooit soveel simpatie, omgee en ondersteuning beleef nie. Almal wil help. Almal baklei saam met ons.” Hulle vra die publiek om Daniël in hul gebede te hou, veral met die komende skandering, terwyl hulle glo dat sy herstelproses van wonderwerke sal voortduur. “Alle eer aan God.”
Daniël het op 17 April in ‘n swembad geval. Hy is tans in die pediatriese intensiewesorgeenheid in Mediclinic, Sandton. Lees meer hier onder:
