KWAZULU-NATAL. – ‘n Beweerde huurmoordenaar van sers. Ntombi Mbanjwa (33), wat op 11 April 2024 gesterf het, is vanoggend vroeg (Donderdag) in Mpolweni, naby Pietermatritzburg, gearresteer. Die verdagte sal vir moord aangekla word en sal Vrydag in die Umzimkhulu-landdroshof verskyn.
Lt.kol Simphiwe Mhlongo van die Valke sê Mbanjwa was op die betrokke datum alleen tuis waar sy deur ‘n onbekende verdagte geskiet is. Sers. Ntokozo Mngqithi (34) het later die aand tuisgekom en op sy verloofde afgekom. Beide was by Umzimkhulu-polisiestasie gestasioneer. Die moordsaak is deur die Valke ondersoek, waarna Mnqithi op 25 November 2024 gearresteer is. Nadat Mnqithi vlugtig in die hof verskyn het, is die saak vir borgaansoek tot 3 Desember 2024 uitgestel en hy het in aanhouding gebly.
Mhlongo sê aan Nuusflits dit is die tweede verdagte in die saak en meer inhegtenisnemings gaan volg.
