GAUTENG. – ‘n Kind (6) is Vrydagaand tydens ‘n gewapende roof by McDonald’s in Brickfield, Meadowdale, se deurry doodgeskiet.
Col. Dimakatso Nevhuhulwi sê twee verdagtes het na bewering die kitskosrestaurant ingegaan en ‘n onbekende bedrag geld geroof. ‘n Derde verdagte, wat glo die wegkommotor bestuur het, het ‘n motor met ‘n pa, ma en ‘n seun by die deurry genader en van persoonlike besittings beroof. Voordat hy hulle beveel het om weg te ry, het hy ‘n skoot na hulle motor geskiet. Onderweg huis toe het die egpaar besef hulle seun is raakgeskiet en het met hom na ‘n hospitaal gehaas, waar hy dood verklaar is.
Nevhuhulwi sê ‘n saak van moord en sakeroof is geopen. Nog geen inhegtenisnemings is gemaak nie.
Die ondersoek duur voort.
Volgens ‘n verklaring van Bedfordview GPF het die insident na 22:00 gebeur. Die verdagtes het glo met geld van die restaurant gevlug. Die kitskosrestaurant was Saterdag gesluit sodat werknemers traumaberading kon ontvang.
