GAUTENG. – Die matriekouers van die Afrikaanse Hoër Meisieskool in Pretoria het hul dogters op die laaste dag van hul 2023-matriekjaar toegesing.
Die spesiale serenade, ‘n lied uit die musiekblyspel Mamma Mia genaamd My Love My Life, afgewissel met Die Seën, het volgens die video duidelik emosie in die eksamenlokaal ontlok.
Marna Jordaan, ‘n onderwyseres van die skool, het die oomblik as “prysloos” beskryf. Sy het al die betrokkenes wat die matriekleerlinge ondersteun het, bedank.
Die meisies verlaat na die serenade die eksamenlokaal sonder hulle skoolskoene wat geskenk word.
Lees haar volledige plasing hier onder:
Daar is geen geld wat ooit oomblikke soos hierdie sal kan koop nie. Hierdie spontane gebaar van die 2023-matriekouers sal my ewig by bly. Besef net opnuut hoe oneindig bevoorreg ek is om op hierdie stadium van my lewe te wees waar ek is. Alle eer aan die Skepper
Affie wees kan eenvoudig nie gedefinieer word nie, dit is ‘n leefwyse wat net beleef kan word. Slegs dan verstaan mens wat die “siel” van hierdie skool is. Die klas van 2023 het soveel liefde uitgestraal en ons almal opnuut daaraan herinner dat ons ‘n “familie” is.
Dankie aan elke ouer, broer, suster, ouma, oupa wat kom sing het, dit word opreg waardeer.
Juffrou Marna Jordaan 
Bron: Afrikaanse Hoër Meisieskool Pretoria
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel
