LIMPOPO. – Mahlangu Johannes Abram (28) is vir die verkragting van ‘n 101-jarige vrou in Zaaiplaas tot lewenslange tronkstraf gevonnis. Hy het ook ’n bykomende drie jaar tronkstraf vir huisbraak gekry. Die beskuldigde is deur DNS-bewyse aan die misdaad gekoppel.
Kol. Malesela Ledwaba, polisiewoordvoerder, sê in ‘n verklaring die misdaad is op 26 Julie 2024 gepleeg toe Abram omstreeks 05:00 by die bejaarde slagoffer se huis ingebreek, haar oorweldig en verkrag het. Hy het daarna deur ’n venster gevlug. Die vrou het onmiddellik hulp ontbied. Haar neef het die verdagte agternagesit.
Speur.AO Victoria Phala van Groblersdal-GKS se deeglike ondersoekwerk het die beskuldigde geïdentifiseer, waarna hy in hegtenis geneem is.
Lt.genl. Thembi Hadebe, die provinsiale polisiekommissaris, het die vonnis verwelkom en gesê dit wys dat misdade teen bejaardes met die uiterste erns hanteer sal word.
