LIMPOPO. – ‘n Man (48) het Maandagoggend met kontant van Limpopo Cash and Carry Supermarket na die Savannah-mall gery om die geld te deponeer. Hy is glo deur verdagtes in die voet geskiet en beroof.
Kol. Malesela Ledwaba sê twee gewapende verdagtes het die slagoffer omstreeks 11:00 in die mall gekonfronteer. Een van die verdagtes het die slagoffer glo onverwags in die regtervoet geskiet, wat veroorsaak het dat hy die sak geld by hom op die vloer gegooi het. Die ander verdagte het die geld opgetel en hulle het weggehardloop. Die slagoffer het sy gelisensieerde vuurwapen uitgehaal en op die verdagtes geskiet, waarna hulle teruggeskiet het. Die verdagtes het met die geld in ‘n wit Hyundai van die toneel gevlug.
Ledwaba sê ‘n mannejag vir die twee verdagtes is geloods. Enigiemand met inligting word versoek om lt.kol. Paul Ragophala by 082 729 0171 te bel.
