KWAZULU-NATAL. – ‘n Man, vermoedelik in sy laat 60’s of 70’s, het vanoggend in ‘n brand by ‘n huis in Eltham Place, in Malvern, wes van Durban, gesterf.
Garrith Jamieson sê hulp is net voor 08:00 na die brandtoneel ontbied. Die Ethekwini-brandweer was reeds besig om die brand van die huis en motorhuis te blus.
“Daar is rapporteer dat een persoon vermoedelik in die huis was.”
Jamieson sê die brandweer het toestemming verleen en paramedici kon die huis ingaan. Die man is geassesseer, maar weens sy noodlottige beserings kon niks vir hom gedoen word nie en hy is dood verklaar.
“In hierdie stadium is die oorsaak van die brand nog nie bekend nie, maar die SAPD en die brandweer sal verder ondersoek instel.”
