GAUTENG. – Die voormalige sokkerspeler Mokete Sean Mogaila is skuldig bevind aan strafbare manslag en versuim om hulp te verleen ná die noodlottige botsing in Tembisa waarin die 9-jarige Gomolemo Mavimbela dood is. Die botsing het op 30 Oktober 2024 in Andrew Maphetoweg plaasgevind.
Mogaila het in die Tembisa-landdroshof skuld beken en is op al drie aanklagte skuldig bevind. Barry Bateman, woordvoerder van AfriForum se privaatvervolgingseenheid, sê die skuldigbevinding is ’n belangrike stap nader aan afsluiting vir die Mavimbela-familie. Volgens Bateman sal die eenheid die families van Gomolemo en Thando, wat in dieselfde botsing ernstig beseer is, bystaan met die voorbereiding van slagofferimpakverklarings vir die vonnisverrigtinge. Mogaila het volgens sy pleitverduideliking beheer oor die voertuig verloor, waarna dit in aankomende verkeer ingeswaai en met ’n ander voertuig gebots het.
Gomolemo, wat ’n passasier in die ander voertuig was, is dood. Mogaila het die ongelukstoneel verlaat, maar hom later dieselfde dag aan die polisie oorgegee. AfriForum sê die nasionale vervolgingsgesag (NVG) het Mogaila se vorige pleitvoorstel in Julie verwerp nadat die privaatvervolgingseenheid namens Gomolemo se ma, Keo Mavimbela, en Carol Khethiwa, die ma van Thando, vertoë aan die staat gerig het. Bateman sê Mogaila het nog nie getuienis gelewer oor wat tot die botsing gelei het nie. Die saak is tot 17 November uitgestel sodat die staat en verdediging die nodige verslae vir die vonnisverrigtinge kan voorberei.
Magaboke Mohlatlole, NVG-woordvoerder, het ingevolge artikel 112(2) van die Strafproseswet skuld beken en die staat se feite en bewerings aanvaar. Mogaila het erken dat die voertuig wat hy bestuur het in aankomende verkeer ingeswaai en teen ’n ander voertuig gebots het waarin ’n vrou en haar twee kinders was. Gomolemo se ma en nog ‘n 13-jarige insittende het ernstige beserings opgedoen. Alkoholbevattende bottels en dwelms is volgens die polisie tydens die ondersoek in sy voertuig gevind.
Mogaila is op al drie aanklagte skuldig bevind. Die saak is tot 17 November 2026 uitgestel vir vonnisoplegging.
