GAUTENG. – Shaune Mogaila, sokkerspeler, sal weer op 21 Julie in die Tembisa-landdroshof verskyn, nadat ‘n voorgestelde pleit-en-vonnisooreenkoms in die saak oor ‘n noodlottige motorongeluk nie aanvaar is nie.
Barry Bateman, woordvoerder van AfriForum se privaatvervolgingseenheid, sê die eenheid het namens Keo Mavimbela, die ma van die negejarige Gomolemo Mavimbela wat in die ongeluk dood is, asook Carol Khethiwa, die ma van Thando wat ernstig beseer is, vertoë aan die nasionale vervolgingsgesag gerig.
Volgens Bateman het die twee ma’s die voorgestelde pleit-en-vonnisooreenkoms verwerp omdat hulle van mening is dat die voorgestelde straf nie die erns van die beweerde oortreding en die trauma wat die slagoffers en hul families ervaar het, weerspieël nie.
Mogaila het op 30 Junie vlugtig in die Tembisa-landdroshof voorgekom. Die saak is vir voorverhoorverrigtinge tot 21 Julie uitgestel.
