WES KAAP. – Rudolph Hufke (20) is deur die Stellenbosch-streekhof tot lewenslange tronkstraf en ’n bykomende 30 jaar direkte gevangenisstraf gevonnis en ook ongeskik verklaar om ’n vuurwapen te besit nadat hy Jesse Mitchell, ‘n BSc-student aan US, in Oktober 2024 vermoor het.
Eric Ntabazalila, NVG-woordvoerder, sê in ‘n verklaring Hufke is skuldig bevind nadat hy ’n pleitooreenkoms met die staat aangegaan het, waarin hy erken het dat hy Mitchell vermoor het en twee rooftogte met verswarende omstandighede gepleeg het – een teen Mitchell en een teen Sikho Matimba.
Luidens sy verklaring het Hufke saam met ’n medebeskuldigde op die betrokke datum in Jan Cilliersstraat, Stellenbosch, besluit om Matimba te beroof. Sy maat het Matimba se rugsak gegryp en weggehardloop, waarna Hufke probeer het om hom met ’n mes aan te val. Toe Matimba terugveg, het Hufke hom met ’n klip in die gesig geslaan voordat hy saam met sy medebeskuldigde gevlug het.
In die vroeë oggendure van 16 Oktober 2024 het Hufke in Borcherdstraat rondgeloop met die doel om mense te beroof. CCTV-beeldmateriaal is in die hof gewys hoe hy saam met ’n man en ’n vrou stap voordat hy van hulle wegbeweeg. Kort daarna ry die oorledene op sy elektriese fiets verby en Hufke steek hom in die nek. Die beeldmateriaal wys hoe Hufke na die plek stap waar die oorledene geval het en sy rugsak optel voordat hy wegstap.
Volgens speur.sers. Calvin Mosses, die ondersoekbeampte, is die mes met Hufke se vingerafdrukke en DNS daarop later deur die polisie opgetel. William Da Gras, streekaanklaer, het in die hof aangevoer dat die misdade met boosheid en voorbedagte rade gepleeg is. “Die beskuldigde het op slagoffers afgepyl wat hy as swak en kwesbaar beskou het,” het Da Gras gesê. Hy het bygevoeg die aanvalle was wreed en onuitgelok en die vonnis moet ’n duidelike boodskap stuur dat sulke geweld nie geduld sal word nie.
In ’n slagofferimpakverklaring het Mitchell se ouma, Christina Mary Mitchell, geskryf dat haar kleinseun se dood op sy 19de verjaarsdag haar steeds ontstel. Sy het ook haar hoop uitgespreek dat die vonnis as afskrikmiddel sal dien en aan ouers van studente die versekering sal gee dat Stellenbosch veilig is.
Hufke is tot lewenslange tronkstraf gevonnis vir Mitchell se moord, asook 15 jaar vir die berowing van Mitchell en nog 15 jaar vir die berowing van Matimba. Die hof het beveel dat die vonnisse gelyklopend uitgedien moet word.
In ’n slagofferimpakverklaring het Christina Mary Mitchell, Mitchell se ouma, haar verdriet beskryf: (Vertaal van Engels na Afrikaans)
“Ons is bejaardes en het nooit gedink ons sou ooit ’n kleinkind verloor nie, veral nie Jesse op so ’n jong ouderdom en op so ’n onverwagse en skielike wyse nie. Ons familie woon wyd verspreid, en elkeen treur op sy eie manier, maar ek kan net probeer om die diep rou en gevoel van verlies wat my man en ek ervaar, te beskryf. Ek hoor nog sy vriendelike, vrolike stem. Ek vind dit moeilik om met ander mense om te gaan op ’n betekenisvolle manier en het my van meeste sosiale aktiwiteite onttrek. Diep hartseer en angs het my metgeselle geword. Jesse se oupa het in stilte onttrek, diep depressief en verward dat so iets kon gebeur.
Jesse is beskryf as iemand wat altyd positief, vriendelik, betroubaar, hardwerkend en ambisieus was. Dit hoor ek ook van sy vriende en sy kerk. Hy was ’n uitstaande leerder en sportman. Hy het sy laaste jaar aan Bishops Diocesan College voltooi en die Allan Gray Orbis-toekenning vir leierskap gewen. By die Universiteit Stellenbosch het hy ook deeltyds gewerk.
Die dag van sy dood was besonder ontstellend en bly my by. Dit was sy 19de verjaarsdag – hy het laat gewerk – en is in die vroeë oggendure aangeval en op die grond agtergelaat – dood. Het hy gely? Die nuus het eers ná 14:00 die familie bereik – watter skok.
My diepste bekommernis is ook vir die families van huidige studente. Ek wonder wat die owerhede doen om die beskerming van studente te verbeter. Stellenbosch is ’n universiteitsdorp waar studente op alle ure van die dag en nag loop of fietsry. Dit is my hoop dat die vonnis as afskrikmiddel sal dien vir moontlike oortreders en as versekering aan ouers oor die veiligheid van Stellenbosch.”
Die direkteur van openbare vervolging in die Wes-Kaap, advokaat Nicolette Bell, het die vonnis verwelkom en die vervolgingspan en ondersoekbeamptes geprys vir hul werk wat daartoe gelei het dat die beskuldigde skuld beken het.
