GAUTENG. – Timothy Omotoso, die omstrede Nigeriese pastoor en televangelis, het Sondag te midde van onafgehandelde sake in die hof die land verlaat. Die nasionale vervolgingsgesag (NVG) sê dit neem kennis van die vertrek, maar sal voortgaan met die appèl teen die vryspraak-uitspraak van die hof.
Mthunzi Mhaga, die nasionale woordvoerder vir die NVG, sê die Suid-Afrikaanse regstelsel vereis nie die aktiewe deelname of teenwoordigheid van ’n beskuldigde tydens die aanhoor van ’n appèl deur ’n hof nie. ’n Appèlproses vereis die betrokkenheid van die regspanne van die apellante, respondente, die registrateur van die hooggeregshof, die hoogste hof van appèl (HHA), sowel as die regbank.
“Timothy Omotoso is nie ’n voortvlugtige van die gereg nie; daar is geen wettige gronde om hom te verhoed om die land te verlaat nie. Sy vertrek beteken dat iemand wat as ongewens beskou word, nie meer sy lewe in hierdie land geniet nie, hangende die uitkoms van die appèl, wat lank kan neem om af te handel.”
Indien die appèl slaag, sal die NVG aansoek doen om sy uitlewering en om aan die bevel van die HHA uitvoering te gee. Die NVG sal alle bestaande bilaterale, streek- en internasionale samewerkingsooreenkomste en meganismes gebruik om te verseker dat hy aan Suid-Afrika uitgelewer word. Dit sluit die bilaterale uitleweringsooreenkoms met Nigerië en die Gemenebes-skemareg vir uitlewering in.
Die televangelis is in April, na ‘n verhoor van agt jaar, op aanklagte van verkragting, mensehandel en seksuele aanranding kwytgeskeld. Hy is ook in die Oos-Kaap oor sy immigrasiestatus in hegtenis geneem.
Lees meer hier onder:
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
