GAUTENG. – Bewerings rakende die deelname van die Islamitiese Republiek van Iran aan die Will For Peace 2026-vlootoefening, waarvoor die president instruksies gegee het, word deur Angie Motshekga, die minister van verdediging en militêre veterane, ondersoek.
Motshekga het dit op rekord geplaas dat die president se instruksies duidelik aan alle betrokke partye gekommunikeer is, dat daar ooreengekom is daaroor en dat dit dienooreenkomstig geïmplementeer en nagekom is. Luidens die verklaring is ’n raad van ondersoek ingestel weens die erns van die bewerings om vas te stel of die president se instruksies gemisinterpreteer of geïgnoreer is. Die raad sal alle feite oor wat tydens die oefening plaasgevind het, vasstel en binne sewe dae ná voltooiing van die oefening ’n verslag aan die minister voorlê.
’n Woordvoerder van die ministerie sê alle regeringsentiteite wat by die oefening betrokke is, het deurgaans in noue samewerking en oorleg met mekaar opgetree.
