LIMPOPO. – Die oorblywende baba van die saamgegroeide tweeling wat op 17 Maart in die Mankweng-hospitaal geskei is, is na Steve Biko-hospitaal in Gauteng oorgeplaas vir verdere behandeling. Dit volg nadat die ander baba verlede week oorlede is.
Ndavhe Ramakuela, woordvoerder van Phophi Ramathuba, premier van Limpopo, sê die besluit is ná ’n vergadering van ’n multidissiplinêre mediese span, in oorleg met Ramathuba en Aaron Motsoaledi, die gesondheidsminister, geneem. Die baba is Saterdag per lugambulans na Steve Biko Akademiese Hospitaal in Pretoria oorgeplaas vir voortgesette gespesialiseerde sorg.
Nadat die tweeling op 28 Januarie gebore is en suksesvol by Mankweng-hospitaal deur ‘n span onder leiding prof. Nyaweleni Tshifularo van mekaar geskei is, het albei babas ernstige infeksies ontwikkel. Ten spyte van intensiewe behandeling het een van die babas aan veelvuldige orgaanversaking beswyk. Oorplasing van die oorblywende baba is gedoen om verdere sorg in ’n ander omgewing te verseker.
Die provinsiale regering het sy medelye met die familie uitgespreek en gesê hulle bly in noue kontak met dokters en die ouers. Die publiek en media is gevra om die familie se privaatheid in hierdie moeilike tyd te respekteer.
