’n Onlangse voorval van ‘n viral TikTok-video het kommer laat ontstaan oor die veiligheid van tieners wat videokletsplatforms gebruik om met vreemdelinge in verbinding te tree. Dié video is klaarblyklik op die toepassing, Omgegle/Omi TV, opgeneem.
Omegle, asook Omi TV, is ontwerp om gebruikers in staat te stel om mense wêreldwyd te ontmoet en met hulle te kommunikeer. Dit word bemark as ‘n toep om met vreemdelinge te praat. In dié video, wat deur die inhoudskepper bekend as @UncleSeeno geplaas is, kan gehoor word hoe een leerder sê: “Yo yo yo, what up my n*****. Vier leerlinge van die Hoërskool Duineveld is intussen geskors.
Die video verskyn onder @UncleSeeno se “Omegle Type Shi-“-lys. Hy vra onder andere in ‘n video aan ‘n meisie “did you say anything wild?”, “did you ask anything wild?”. Hyself gebruik in verskeie video’s die woord “n*****. Nuusflits het via TikTok na hom uitgereik vir kommentaar oor hoekom hy dié video’s maak waarin meestal wat blyk tieners is, verskyn. Dit wys ook in sommige video’s “Omi TV”.
Lees die vorige berig hier: Vier leerlinge geskors na ‘rassistiese’ TikTok-video
Omegle/Omi TV is ‘n bekende platform wat gebruikers met mekaar verbind om video’s op te neem. Alhoewel hierdie toepassings bemark word as prettige maniere om nuwe mense te ontmoet en vriende te maak, is dit grootliks ongereguleerd, wat die deur oopmaak vir verskeie risiko’s, veral vir tieners.
Een van die grootste bekommernisse is dat tieners dikwels nie die volwassenheid het om onvanpaste of skadelike interaksies aanlyn te hanteer nie. Gebruikers kan blootgestel word aan kuberafknouery, eksplisiete inhoud en roofdiere wat voordeel trek uit die platform se anonimiteit. In sommige gevalle word video’s van hierdie platforms uiteindelik op sosialemedia-webwerwe soos TikTok gedeel, wat tieners blootstel aan openbare bespotting of uitbuiting.
In die geval van die Upington-studente het die video nie net viraal geraak nie, maar ook wydverspreide veroordeling uitgelok.
Aangesien toepassings soos Omegle/Omi TV steeds in gewildheid toeneem, moet ouers proaktiewe stappe doen om hul kinders se aanlyn veiligheid te verseker.
Hier is ‘n paar sleutelwenke vir ouers van tieners wat videokletstoepassings gebruik:
- Oop gesprekke: Praat met jou tieners oor die risiko’s om aanlyn met vreemdelinge te gesels. Maak seker dat hulle die potensiële gevare van die deel van persoonlike inligting of onvanpaste gesprekke verstaan.
- Toesig: Hou die toepassings dop wat jou tieners gebruik. Maak seker dat hulle bewus is van die gevolge van hul aanlyn aksies en die potensiaal om op platforms soos TikTok opgeneem of blootgestel te word.
- Privaatheidinstellings: Moedig jou tieners aan om privaatheidinstellings te gebruik op alle toepassings wat hulle gebruik.
- Beperk skermtyd: Stel grense op hoeveel tyd jou tieners aan videokletsprogramme spandeer. Oormatige gebruik kan die waarskynlikheid verhoog om skadelike inhoud of mense teë te kom.
- Rapporteer en Blokkering: Maak seker jou kind weet hoe om gebruikers wat onvanpas optree, aan te meld en te blokkeer.
- Wees bewus van virale inhoud: Leer jou kind van die permanente implikasies van die internet. Video’s kan maklik gedeel en herdeel word, wat tot ernstige gevolge kan lei. Maak seker dat hulle die risiko’s verstaan om in video’s te verskyn wat vir die verkeerde redes viraal kan raak.
Soos die onlangse voorval waarby die Hoërskool Duinveveld-student betrokke was, toon, is die gevare van hierdie toepassings baie werklik. Ouers sowel as tieners moet bewus wees van die risiko’s en die nodige voorsorgmaatreëls tref om hulself te beskerm.
